Monday, June 23, 2014

සිල්ලර කේස් තොග වටිණාකමට කොන්වර්ට් කිරීමේ කලාව පට්ට දේශප්‍රේමී එකකි....$@%^&*

ඔන්න මම මහපාරේ යමින් ඉන්නවා. නිකමට කියන හැටියට වුණත් අපි ඕනැම කෙනෙකුට මහ පාරේ යන්න තහංචියක් නෑ නොවැ. මගේ වාහනේට ඉස්සරහින් යන වාහනය පට්ට කබල් එකක්. ඒක හිටු කියල ගාටනවා. අයියෝ ! මේවා පාරට දාන්න තාමත් ඉඩ දෙනවනේ ! ලංකාවේ නීතියයි, ඒවා ක්‍රියාත්මක කරවන පොරවලුයි ගැන මට කන්න කේන්තියි. මට හදිසියි. කීප විටක් ම ඉස්සර කරන්න හැදුවත්ඉස්සරහ වාහනයේ  ‍පොරවල් මට පොඩ්ඩක්වත් ඉඩ දෙන්නේ නෑ.  උන් ඒ මදිවට මායි, මගේ වාහනයේ ඉන්න අනිත් අයවයි පෙන්වමින් මොනවද කියනවා. නක්කලේ දානවා වගේ. දැන්නම් කේස් එක ට්‍රැෆික් සිමාව පැන ගෙන ගිහින් පර්සනල් කේස් එකක් වේගෙන එනවා. හුහ් ! මෙන් ඊළඟට අර වාහනයේ පොරවල් බෙල්ල එලියට දාගෙන අපිට මොනවද කියනවා. "ඕයි, හදිසිද ? හදා ගන්නවා තමුසෙලටම කියලා පාරවල්"  මේ විදියට කියද්දී අපේ වාහනයේ ඉන්න පොරවලටත් යකා නැඟගෙන-නැඟගෙන ගිහිල්ල දොට්ට පැනපි. "ඇයි තොපි හිතුවද පාර තොපේ කියලා!" දැන් වාහන දෙකේ ම පොරවල් මෙහෙයවන්නේ යක්කු විසින් ! ඊළඟ විනාඩි කීපයේ දි යක්කු එළියට පැනගෙන අතින් පයින් ප්‍රශ්නේ බේරගන්න මට්ටමට සංවර්ධනය වුණා !

දැන් ඔන්න මේක පොලිස් කේස් එකක් වෙච්චි ! මේ අ-වෙලාවේ ඉතාම වැදගත් වුණා අපේ වාහනයේ බෞද්ධ චිවරධාරී-කෙළින් ම කියතෙ‍ාත් භික්ෂූන් වහන්සේ නමක් හිටපු එක. අපි හොයා ගත්තා, අනිත් වහනය මුස්ලිම් කියලා. වාහනයේ ගිය පොරවල් ඇඳ-පැලඳ යිටි හැටි, ඒරියා එකේ හැටි, කතා කරපු හැටි වගේ සියළුම ලක්ෂණ ගැන ඉතා ම වැදගත් විද්‍යාත්මක නිරික්ෂණ අනුවයි මේ හඳුනාගැනිම කළේ. දැන් ඉතින් වැඩේ ප්‍රත්‍යක්ෂයි නේ. 'හම්බයෝ(පිටසක්වල වාසින් පිරිසකි) අපේ බෞද්ධ භික්ෂූන් වහන්සේ නමක් ඇතුළු පිරිසකට පහර දෙති' පට්ට ස්ලොගන් එක ! මේ වගේ එකක් වෙන ඕන ඕනැම ගන් එකකට වඩා පවර්ෆුල් ! අනිත් ගන් නිකම්ම පත්තු කරවතෑකි මේ ස්ලෝ-ගන් එකෙන්. හුහ් ! පොලීසිය ගිහින් අනිත් වාහනයේ එකෙක් කුදලගෙන ආවා. "කො අනිත් උන් ? එතැන හිටපු ඔක්කොම අත්අඩංගුවට ගන්න තොපිට බැරි වුණාද ?" මෙන්න වැඩේ නැගලා යනවා.
දැන් ස්ලෝගන් එක මෙහෙමයි. "පිටසක්වල ජිවින් පිරිසක් වන හම්බයන් විසින් අති උත්තරීතර අපගේ බෞද්ධ භික්ෂූන් වහන්සේ නමකට හා ඒ සමඟ ගමන් කළ සැදැහැවතුන් පිරිසකට  අපහාස කොට, පහර දි ලේ සොළවා ඇත. ‍පොලීසිය ද මේ හමුවේ නිද්‍රාශිලී වෙමින් පිටසක්වල වාසී හම්බයන්ට සහාය දෙයි. මහපොළොවේ උරුමක්කාරයන් වන අප, අපගේ මහපොළොව මත ම අනාථ- අසරණ වී ඇත."
මුළු ලෝකයමත්, පිටසක්වල වාසින් සමඟ එක් වි මේ වැනි මොහොතවල අප ව ගිල ගැනීමට බලා සිටින බව, (හරියට ම බෞද්ධ නොවුණත්) විෂ්ණු දෙවියන් විසින්ද අපට පැහැදිලි කර දී ඇති නිසා ගැලවිමක් ඇත්තේ 'අපේ-අපේම' වරිගයේ ගැලවුම්කාරයන්ගෙන් පමණකි. ඒ නිසා තියෙන පොලිසිය-මිලිටරියටත් වඩා ෂෝක් එකට වැඩ කළ හැකි 'බොදු බලු සේනා' ප්‍රමුඛ නා නා වරිග සේනා දැන් සීන් එකට එන්ටර් වෙති. මේ ඇවිත් හුදු 'ට්‍රැෆික්' ප්‍රශ්නයක්, 'නීතිය හා සාමය බිඳවැටීමේ පොදු තත්වයක ප්‍රතිපලයක්' කියලා විග්‍රහ කරන්න යන ජාතිද්‍රෝහීන්-දේශද්‍රෝහින් මේ සීන් එකෙන් එලියේ ති‍යන එක අනිවා කරන්න ඕන; මොකද උන් ඇවිල්ල මේ පැහැදිලි කිරිම් කළාට පස්සේ, අමාරුවෙන් ගෑස් ගහල වගේ පුම්බගත්තු 'ජාති වාත්සල්ලේ' ඕජස එළියට පැනලා, සැර වාෂ්ප වෙලා යතෑකි ලේසියෙන් ම !
පොල්ලෙන් ගහල, ලේ වගුරලා, යකඩින්කොටු කරලා ප්‍රශ්න විසඳන්න පුළුවන් බවත්, ගෞතම බුදුන්ගේ හේතු-ඵල ධර්මය පවා ඒ අනුව වැරදි බවත්, බුදුදහමටත් වඩා විද්‍යාත්මක සත්‍යයන් හෙළිදරව් කරල, (ඒ නිසා ම බුදු දහමටත් රැක‍ෙන්න වෙන්නෙත් මේ සක්වලේ තමන් යටතේ  විතරක් බව නිසැකව ම ඔප්පු කරල) අපේ මහ රජු ඇතුළු එක්සේසත් පාලක පවුල්-අනු පවුල්-අනු අනු පවුල් හත්පොළේ ගා ගෙන ඉන්න මේ වගේ වේලාවක, වැඩි වැඩියෙන් මේ වගේ ට්‍රැෆික්, වැට-කොටු, පික්-පොකට්, අසභ්‍ය වචනෙන් පිටසක්වල බසින් බැන වැදිම්, ගස් ගෙඩි කැඩිම්, විරිත්තිම්, ඇස් කොනින් බැලිම්,.......වගේ නහුතයකුත් තව ටිකක් කේස් එනවානම්......අර සේනාවේ හා අනිකුත් සේනාවල පිහිටෙන් තව ටික කාලයක් හරි උන්නාන්සේලාට වැජඹෙන්නට ඉඩ හදා දීමේ පින් මහිමයම.............................හපොයි ඇති නේ......!!!
   
 


Tuesday, June 10, 2014

ලට්ට-ලොට්ට සංධානේ කල -දවස..........

විමල් වීරවංශ මහත්තයගේ 'පක්ෂය' , "ආණ්ඩුවෙන් එළියට බහිනවා" කියලා ආයෙමත් 'තර්ජනයක්' කරලා ! එළියට බැසීම සඳහා කොන්දේසිය තමයි, එම 'පක්ෂය' විසින් ඉදිරිපත් කරන ලද යෝජනා-නිර්දේශ හෝ සමාන අර්ථයකින් හඳන්වනු ලබන කතන්දර ඉටු නොකිරීම ! http://lankacnews.com/sinhala/main-news/115085/ලිංකුවෙන් මේ කියන කතන්දර දුසිම කැමති කෙනෙකුට ඒ හඬින් ම කියව ගන්න පුළුවන්.

ගොඩ දෙනෙක් මේ ගැන කිව්වේ "මේ තවත් රඟපෑමක්" විතරයි කියලා. එහෙම කියපු අය අදහස් කළේ, ඇත්තට ම කෙරෙනවානම් මේ දුසිම හරි ෂෝක් කියලද මන්දා....මටත් දැනෙන විදියටනම් මේ තවත් පට්ට රඟපෑමක් ම තමයි. ඒත්, ආණ්ඩුවෙන් පරිබාහිර එකක් නොවෙයි; මහා ආණ්ඩු යන්ත්‍රය ඇතුළේ කෙරෙන තවත් එකක්. කොටින් ම මේ ආණ්ඩුවේ නාටකයේ ම තවත් එපිසෝඩ් එකක් විතරයි.

වීරවංශ මහත්තයාගේ මේ වර්ගයේ මීට කළින් හැසිරීම් ටික අරන් බැලුවාමත් ඒ බව පේනවනේ. සාමාන්‍යයෙන් වෙන්නේ මෙන්න මෙහෙමයි; මේ ආණ්ඩුව හරියට 'කතරගම දෙයියන්ගේ පිංතූරයක්' වගේ. 'වගේ' කීවට, වගේමත් නෑ. එකම සමානකම තමයි, මූණු දුසිම් භාගයයි, අත්-කකුල්(?) දුසිම ගානේ පිහිටලා තියන එක.  දැන් ආණ්ඩුවට ජාත්‍යන්තර හොඳ-හිත වගේ දෙයක් ඕන කියමු, සල්ලි ටිකක් හොයාගන්න වගේ වැඩකට. එතකොට ඔය කියන ජාත්‍යන්තර ප්‍රජාව කියනව නොවැ වීරවංශ මහත්තයා මේ දැනුත් දානව වගේ 'කොන්දේසි' කතන්දර. දැන් ඒවා නෑහුනා වගේ ඉන්නත් බෑ. ඉතින් මොකද කරන්නේ? ඕන්න, වීරවංශ, රණවක වගේ අපේ දේශප්‍රේමී මහත්තුරු කල-එලි බහිනවා ඒ වේලාවට('බස්සනවා' කිවත් අවුලක් නෑ) ඉතින් එක්සත් ජාතීන්ගේ සංවිධානය තහනම් කරනු;  පළාත් සභා අහෝසි කරනු වගේ තොවිල් ටිකක් නටනවා. ඉතින් ආණ්ඩුව කියනවා, "අපේ ආණ්ඩුව ලොකු විවිධත්වයකින් යුතු ආණ්ඩුවක්. ඉතින් අපි නම් මේකට කිසි ප්‍රශ්නයක් නෑ. ඒත්, ප්‍රජාතන්ත්‍රවාදීව අපි අනිත් අය ගැනත් හිතන්න එපා ය" කියලා. අර තොවිල්-පවිල් කරන කට්ටිය පෙන්නන එකයි තියෙන්නේ. එතකොට 'ප්‍රායෝගික සමතුලිත' තැනක් තෝරා ගන්න පුළුවන් නොවැ ඒ කට්ටියටම අපහසුවක් නොවෙන විදියේ.

දැන් මේකේ නාට්‍යමය ගුණ ගැන මට දැනෙන්න තවත් පට්ට හේතුවක් තියෙනවා. ඒ තමයි වීරවංශ වගේ මහත්තුරුන්ගේ 'පක්ෂ' කියන්නේ, මොන වගේ සංවිධාන ජාතියක්ද කියල. මේ කතන්දර දුසිම අනුමත කර ගන්න, කොළඹ සුගතදාස ස්ටේඩියම් එක පුරවලා, රොද බැඳ ගත්ත 'පක්ෂ සමුළුවක්' තිබුණා නොවැ. මේකට සම්බන්ධ වුණ චරිත දෙකක් එක්ක මට කතා කරන්න ලැබුණා.
"ඔයාල ඒකමතිකව යෝජනාවලියක් සම්මත කළා ලු නේද?" මම ඇහුවා නිකමට වගේ. අන් ඇවිත් මගේ පට්ට හිතවත්තු.
"මොන යෝජනාවලියක්ද !" තැන් දෙකකදි හමු වුණත් මේ දෙන්නම එක පාරටම මගෙන් ඇහුවේ එකම ප්‍රශ්නේ.
" ඇයි; අර ඕගොල්ලන්ගේ වීරවංශ ඇමති තුමාගේ පක්ෂ සම්මේලනයේ........"
"මොන සම්මේලනයක්ද ?"
දෙයියනේ! මුං දෙන්නම ඒකටත් එකම උත්තරේ. ඒත් මම දන්නවා මෙයාල එහෙම එකකට ගියා කියලා. බොරු කියන්න ඕනකමකුත් නෑ. එහෙනම් මේ මොකක්ද කියන්නේ ? පස්සේ බැලින්නම්; ඇත්තටම ඒකට ආපු ගොඩාක් අය වගේ ම එයාලත් දන්නේ නෑ ඒ ගොල්ල ගිය වැඩේ මොකක්ද කියලා. ඇත්ත වශයෙන් ම එතනින් කෙනෙක් වීරවංශ මහත්තයා ඇමති හැටියට වලංගු ආයතනයක රස්සාව කරන්න සිදු වුණ කෙනෙක්; අනිත් කෙනාගේ ගර්භනී බිරින්දෑ එහෙම තැනක රස්සාව කරනවා. ඉතින් මේ රස්සාවල් ආරස්සා කරගැනීම මිස වෙන කිසිම ...................ක් මෙයාල කාටවත් නෑ ! දැන් විහිලුවංශ මහත්තයගේ ම උදාහරණය පෙරට ගෙනිච්චොත්, ඒ ආයතනවල රස්සා කරන අයට අතිරේක ව ඒ අමාත්‍යාංශයේ ‍සේවාවන්ට හිමිකම් කියන, ඒත් වන්දිභට්ටකම් කිරීමෙන් තොරව ඒවා නොලැබෙන බව තේරුම් අරන් ඉන්න කට්ටියත් මේ වගේ තැන්වල හිස් ඉඩ පුරවන්න දක්කගෙන එනවා.
"බස් එකක් එනවා.අහවල් අය ඔක්කොම නගින්න කියනවා. සමහර විට යනකම් දන්නේ නෑ මොකටද-කොහාටද-මොනව කරන්නද වගේ දේවල්. තවත් සමහරක් විට ගිහිල්ල ඇවිල්ලත් දන්නේනෑ !"
මේ කියන 'සම්මේලනය' දවසේ වැඩ කරන අයට කීවලු "හාෆ් ඩේ එකක් දාල එන්න" කියලා. ඒත් මැතිවරණ කාලේ පවා ගොඩක් වෙලාවට මේවාට ලොක්කන්ගෙන් 'ඩියුටි ලිව්' ලැබෙනවා.සමහර දාට මොන ම ලිව් එකක්වත් නැතිව ගිහින් එන්නත් පුළුවන්. ලීව්ද-නැද්ද-ලීව්නම් මොන වර්ගයෙද වගේ හැම දෙයක්ම ලොක්කෝ හරහා තමයි තින්දු වෙන්නේ. ආයතන ලොක්කෝ ඒවා තින්දු කරන්නේ අමාත්‍යාංශ ලොක්කන්ගේ හිත් සන්තෝස වෙන විදියට. අමාත්‍යාංස ලොක්කෝ බලන්නේ ආණ්ඩුවේ ඇත්තන්ගේ හිත් සන්තෝස වෙන විදියට ඒව කරන්න. ඒ ඇත්තෝ බලන්නේ මහරජතුමාගේ.......! කෙළවරක් මට හිතා ගන්න බෑ. ඔන්න මේක බ්ලොග් එකට දාන්න ඔන්න-මෙන්න තියලා ආරංචි වුණා මේ තාලෙටම අද කට්ටිය ගෝල්ෆේස් එක්ක ගියා කියලා ! (ඒ තමිල්නාඩු මහඇමතිනි-ජයලලිතා‍ ගේ ප්‍රකාශයකට විරෝධය පළ කරන්නලු;ඒත් 'ප්‍රකාශය' මොකක්ද කියලා දන්න විරෝධතාකරුවෝ හොයාගන්න පට්ට අමාරු වුණා ලු ! (හපොයි 'ජන-මතය' ! )
දැන් ඉතින් මේ විදියේ 'ජනපදනමක්' නම් මේ උන්නැහේ්ලට තියෙන්නේ, ආණ්ඩුවෙන් එළියට ආපු දවසක ඒ උදවියට යන කලදවසක් ගැන හිතාගතෑකි නේ ! ඉතින් එයාල ආන්ඩුවෙන් එළියට ගියොත්, ඒ යන්නේ මේ ආණ්ඩුව වැටෙන්න ඔන්න මෙන්න කියල ෆුල් ෂුවර් පිට ඊළඟ එකකට සෙට් වෙන්නයි ඒ. මොකද, මේවර්ගයේ කට්ටිය ආණ්ඩු බලයෙන් එළියට විසි වුණ ගමන් වැටෙන්න කුණු කූඩවත් නැති වෙනවා කියන එක අනිත් හැමෝටම වඩා දන්නේ එයාලමයි !

    

Tuesday, April 15, 2014

වඳින්නම්; "සුබ අළුත් අවුරුද්දක්"නම් එපෝ !!!

හාර මාසයක් අහවර වෙන්න කළියෙන්, ඕන් තවත් පාරක් තවත් 'අළුත් අවුරුද්දක්' ආපි ! "සල්ලි තියේනම් හැමදාම අවුරුදු තමයි" කියන සමාජයක මේ ලක්ෂණය මොන තරම් සුබ ලකුණක්ද අප්පා......එක ම අවුරුද්ද ඇතුළේ අළුත් අවුරුදු ම දෙකයි ! (තෛපොන්ගල් කියල දමිල ජනතාවගේ වෙන ම එකකුත් තියෙන නිසා හරියට ම බැලුවොත් ඊටත් වැඩියි) බිල් ගෙවාගන්න බැරි ව අවුට් ගොයින් කපල මාස භාගයක් ම දුවන අපේ ජංගම දුරකථනවලටත්, අපේ ම වියදමින් හරි, මේවා අදාල ද-නැද්ද වගේ කිසි ම වාද-භේදයක් නැතිව, මහ රජතුමාත්,  සුබපැතුම් පණිවුඩ එවල තිබුණා. කාටද ආඩම්බර අප්පා ! මිලියන ගාණක් එහෙම එස්.එම්.එස්. ගගහ ඉන්න තරම් කාලයක්-ධනයක්-ඕනකමක්-ආසාවක් තියෙන රජතුමෙකුගේ යටත් වැසියන් වෙන එක.....හැබැයි, උන්නාන්සේ ට හා මගේ සහෝදර රටවැසියා ට බොහෝම ගෞරවයෙන් යුතු ව දන්වා හිටින්න ඕන වෙන කාරණාවකුත් තියෙනවා. මේ අදාල කාල පරිච්ඡේදවල දී මට පොඩි අසනිප ගතියක් දැනෙනවා, ඔක්කාරයක් එක්ක, මෙන්න මේ එක ම එක වචන සෙට් එකක් දිගින් දිගට ම අහල;දැකල; මතුරලා; "සුබ අළුත් අවුරුද්දක් වේවා" ; " එසේ ම වේවා"; ඕන් ඔය වචන සෙට් එක ! මගේ මනස්ගාත ඔළුව ට එන්නේ 'සුබපැතුම් මෙෂින්' වගේ එකක්. එහෙම එකකට තියෙන්නේ බොහෝම සිමිත භාෂාවක් ! හරියට මෙන්න මේ වගේ. පැය 24ම, දවස් 365ම මගේ සල්ලි ගන්න මට පුළුවන් කියල කිව්ව නිසා, මම යනව අදාල බැංකුවේ ටෙලර් මෙෂින් එක ළඟ ට. එතැන දි මට වෙන්න පුළුවන් දේවල් ගණනාවක් තියෙන්න පුළුවන්. සරල විදිය ට සල්ලි අර ගෙන එන්නත් පුළුවන්. බැරි වෙන්න පුළුවන් හේතු ගොඩකුත් තියෙන්න පුළුවන්. රහස් අංකය අමතක වුණා; කාඩ් එකේ මොනව හරි ඇද-පළුද්දක් තිබුණා;බැංකුවේ සල්ලි ඉවර වෙලා....හපොයි, කොයි තරම් දේවල් වෙන්න පුළුවන් ද ?
ඉතින් මම මෙෂින් එකට මගේ ප්‍රශ්නය කොයි තරම් බරපතල ද කියල කියල දන්න හැම විදියෙන් ම පැහැදිලි කරන්න ට්‍රයි කරනවා. ම්හු.... කොහොම කිවත් මූට ඒක තේරෙන්නෙ ම නෑ !  (මොකද ඒකට අදාල බොත්තම් මේ මෙෂින් එ‍කේ නෑ) මිනිස්සු කියන්නේ 'මෙෂින්' නොවෙයි කීව ට, ගොඩක් වෙලාවට, ගොඩක් මිනිස්සුන්ටත් තියෙන්නේ මේ වගේ බොත්තම් කීපයක, සීමාසහිත භාෂාවක් විතරයි කියල මට දැනිල තියෙනවා. චාලි චැප්ලින් 'The factory' චිත්‍රපටයෙන් මතු කළා වගේ; මේක වෙන විදියකට මිනිස්සුන් ට තමන් ගේ භාෂාව අහිමි කිරිම පිළිබඳ ප්‍රශ්නයක්. කොහොම වුණත් දැන් 'සාමාන්‍ය ජනයා' වෙන්නේ අන්න එහෙම උන්.
ඉතින් අපි උදේ - හවා කරන ගොඩාක් මැතිරිම් මෙන්න මේ වගේ තමයි. මේ අවුරුද්වල තියෙන විශේෂත්වය මේ මැෂින් කථා විසි-තිස් ගුණයකින් ගුණ වෙලා ඇග ට කඩා පනින එක ! ඒ නිසා මේකනම් මට හරි ම අප්පිරියාජනක විදියට සාමාන්‍යයෙන් ම සාමාන්‍ය වෙලා !  ඔයාල ට කොහොමද මේක දැනෙන්නේ ? මම ඔයාල ගේ සනීපෙට බාධාවක් කාරිය කළානම්, ඒත් සමාව ඉල්ලන්න වගේ අදහසක් මට නැහැ. තරහක්-වෛරයක් වගේ දෙයක් නිසා‍ නො වෙයි; 'මැෂිමක්' නො වීමේ සනීපය, හොයාගන්න පුළුවන්නම්, අපි කොයි කාටත්......

Thursday, April 3, 2014

ජනතාවට එරෙහි ව ජනතාව ! (රෝහලින් එහා ගිය අලි ලෙඩක්)

රෝහල් කාර්ය මණ්ඩල එකිනෙකාට එරෙහිව අවි අමෝරා ගනිමින් සිටිති. කාගෙනුත් අපට අසන්න ට ඇත්තේ 'තොප ට ලැජ්ජාවක් නැද්ද' යන්න පමණි. එහෙත් ලැජ්ජාවක් නැතිකම ම අභිමානයක් වූ රටක ඒ ප්‍රශ්නය අසා තේරුමක් නැති බැවින් කළ යුත්තේ කුමක්දැයි සිතාගැනීමේ නොහැකියාවකින් පෙළීමේ ඉරණම ට ගොදුරු වී සිටිමි.

ඊයේ සිට පවුල් සෞඛ්‍ය සේවිකාවන් වැඩවර්ජනයේ ය; ඒ හෙදියන් ට සූතිකාගාර පුහුණුව ලබා දිමට එරෙහිව ය. අද සිට හෙද-හෙදියන් වැඩවර්ජනයේ ය. ඒ ඔවුන් ට සූතිකාගාර පුහුණුව ලබා දෙන ලෙස ඉල්ලමිනි. හෙද- හෙදියන් ට එම පුහුණුව දිම ගැන වෛද්‍ය නිලධාරීන්ගේ සංගමය විරුද්ධ බව පැවසෙතත්, ඊට හේතුවක් පැහැදිලි නැත.  පැහැදිලි හේතුවක් තිබුණත්-නැතත් ඔවුනුත් විරුද්ධ බවනම් පැහැදිලි ය. දැන් මේ සමහන් කළ නොහැකි පටලැවිල්ල මතු වී, පැතිරෙමින් ඇත්තේ එක ම සේවාස්ථානයක, එකට වැඩ කරමින් සිටින කණ්ඩායම් අතර ය.  ඉලක්කය කොහොමටවත් සේවාලාභින් වන රෝගින් නො වේ; අඩු ම ගණනේ සහෝදර සේවක-සේවිකාවන් ද නොවේ. (සමාවන්න; ඔවුනගේ සහෝදරත්වය වාත්තීය පටියකට සීසා වූවක්දැයි නොදනිමි. එහෙත් දිගු-දුර විමසතොත් එහෙව් එකක්වත් එතැන නොමැති බැව් හොදට ම පැහැදිලි වනු ඇත)

මේ පට්ට කුහකකමක් ලෙස හදුන්වන බ්ලොග් සටහන් දුටුවෙමි.  මම ද ඒවා සමඟ සම්පූඍණයෙන් ම- හැකිනම් ඊටත් එහා එකඟ වෙමි.

එහෙත් ප්‍රශ්නය ඒවායේ දක්වා ඇති පමණටත් වඩා පැතිරුණ එකකි.  සෞඛ්‍ය ක්ෂේත්‍රය මේ වෘත්තීය පට්ටම් කුහකත්වය සඳහා නම් දැරූ තැනකි. එහෙත්, එසේ ඇත්තේ ඒ තැන පමණක් ද? බියජනක හා අප්‍රසන්න කරුණනම් මෙය කොහෙත් ම එතැනට සීමා වූවක් නො වීම ය.   සටන් හැටියට එළියට නොආවත්, අභ්‍යන්තරික යටිකූට්ටු මෙන් ම අප්පිරියාජනක නිල තීන්දු මගින් ද විසඳා ගෙන ඇති පරිදි බොහෝ රජයේ කාර්යාලවල කෑම කාමරය, විවෙික ස්ථානය, වැසිකිලිය පවා මෙසේ වෘත්තිය ධූරාවලීන් අනූව බෙදා වෙන් කොට ඇත. ධූරාවලිය ට අනුව පහසුකම් ද ධූරාවලිගත කර ඇත. පාසල වූ කලි මෙම අසමානාත්මතාවය මුළින් ම පුරුදු-පුහුණු කරන තැන ලෙස හඳුනා ගත හැක්කේ සිසු-ගුරු-විදුහල්පති ලෙස පොදු පහසුකම් ධූරාවලීගත කිරීමෙනි. සරසවියේ දී 'ජේස්ට උත්තමයන්' බව ට තමන් විසින් ම තනතුරුලාභී වන ශිෂ්‍ය පරපුර මගින් ම මේ අසමානත්වයේ සම්ප්‍රදාය සජීවිකරණය කෙරේ.  ව්‍යවස්ථාවේ මූලික අයිතිවාසිකම් යටතේ ඇති සමානාත්මතා නීතිවලින්වත් හවුහරණක් නැතිව අනාථ වන මෙවැනි අවස්ථා රජයේ ආයතනවල උඩපිනුම් ගසද්දි අනෙක් ආයතන ගැන කවර කථා ද !

ඒ අනුව සෞඛ්‍ය ක්ෂේත්‍රය ගැන කතාවට ආවත් අපි මේ තුච්ඡ අසමානතා සම්ප්‍රදායයන් හැම තැන ම ක්‍රියාත්මක කරමින් නොසිටිමු ද? අපේ පිළිකුල මේ මුළු මහත් සම්ප්‍රදාය කෙරේ ම එල්ල විය යුතු නො වේද?  

ප්‍රශ්නය -නැත්නම් අර්බුදයට යටින් ඇති මූලික හේතුව ලෙස මා දකින්නේ, ලංකාව අඩු දියුණු රටක් වීම තුළ ය. අඩු පහසුකම් සොච්චම තුළ තමන් ගේ පට්ටම හා මඬිය පමණක් නැති උත්තරිතරත්වයකට පත් කර ගන්නට අවශ්‍ය හීනමානි මානසිකත්වය ට මෙය සරු පොළොවකි.  මුළින් කී කුහකත්වය ට හේතුව මෙය යයි සිතමි. මෙය පරාජය කළ හැක්කේ දියුණු වෘත්තිය සමිති විඥානයක් තුළිනි. එවැන්නක් අනිවාර්යෙන් ම වැඩ කරන සාමාන්‍ය ජනයා ට වඩා ඉදිරියෙන් දකින්නත් විය යුතු ය. එවැන්නක් කළ හැක්කේ දියුණු දේශපාලන ව්‍යාපාරයක මඟපෙන්විමක් ඇත්නම් පමණි. එහෙත් අප ට එවැන්නක් ද අැති බවක් නොපෙනෙයි.  පක්ෂ සම්බන්ධ වුව ද-නැතද, (ඒවා සැබෑ 'පක්ෂ' නො වන බැවින්) ඒවා යේ වෙනසක් නැත. බොහෝ විට වෘත්තිය සමිති ඇත්තේ සේවකයන්ටත් වඩා පසු පසිනි.  ඒ නිසා ප්‍රතිඵලය වි ඇත්තේ අතිශයින් ම ‍'පෞද්ගලීකරණය'ට ලක් වි ඇති සේවකයා ගේ-සේවිකාව ගේ පිළිබිමුව ම පෙන්වමින්, ඒවා ද මේ පටු කුහකත්වයේ ප්‍රකාශකයන් බව ට පත් විම ය. මෙය අභියෝග කළ හැකි ගැඹුරු සමාජ ව්‍යාපාරයන් ද අප සතු නො වේ.

අඩු ම ගණනේ එවැන්නක් සඳහා මේ වැනි ලිවීම්වලින් වත් කිසිවක් වේ දැයි සිතා ගත නො හැක. එහෙත් ඒ වෙනුවෙන් දකිනා සිහින මෙසේ හෝ සටහන් කර තැබිම වැදගත් වනු ඇතැයි නො සිතමු ද?

සෞඛ්‍ය ක්ෂේත්‍රයේ මතු ව ඇති මේ මොහොතේ අර්බුදය ට වහා ම ගෙන ආ යුතු ප්‍රගතිශිලි විසඳුම ලෙස මා දකිනුයේ හෙද නිපධාරිනින් ට පමණක් නො ව හෙද නිලධාරින්ට ද සූතිකා පුහුණුව ලබා දෙමින් සියළුම පවුල් සෞඛ්‍ය සේවිකාවන් හෙද සේවය ට අනුයුක්ත කරගැනිමයි. අදාල පුහුණුවේ දි ඔවුන් ගේ සේවය උපදේශක පදනමකින් ද ලබා ගත හැකි වනු ඇත.  ඔවුන්ගේ ක්ෂේත්‍ර රාජකාරි ආදි සුවිශේෂතා සළකා වැටුප් විෂමතාවන් ට හේතු නො වන පරිද්දෙන් ශ්‍රේණි ගත කිරීමේ හැකියාව විමසිය හැකි වනු ඇත.

කෙසේ වුව ද, වැඩපොළ මට්ටමේ ඇති මේ කුහක අසමානාත්මතා සම්ප්‍රදාය අතු ගා දැමිම අත්‍යවශ්‍ය කරුණක් වනු ඇත. ඒ වන තුරු ජනතාවගේ අයිතිවාසිකම් මැඩ පැවැත්වීම-උදුරා ගැනිම ගැන ආණ්ඩුවලට-සියළු ආකාරයේ මර්දකයන් ට වෙහෙසක් නො දී, ඒ කාර්යයනුත් අදාල ජනතාව විසින් ම ඉටු කර ගනු ඇත.
 
     

     

Monday, March 31, 2014

මේ ඡන්ද ප්‍රතිඵලය ජාත්‍යන්තර මට්ටමේ ජයග්‍රහණයක් !

ලුණු රහ මහා සාගරයක් මැද කඳුළු කැටයක් වේච්ච මේ පුංචි දූපතේ මහා රජ්ජුරුවොයි, පිටසක්වල වාසියෙක් තරමට ම හොඳට ම හුදෙකලා පුරවැස්සෙක් වන මමයි දෙන්න ම හිතුවා හරියට ම හරි !

ඇත්ත වශයෙන් ම, ආන්ඩුව කරන ඇත්තන්ගේ මේ ලැබුවා කියන 'ජයග්‍රහනය', දැනුවත් ව හෝ නොදැනුවත් ව මුළු මහත් ලංකාවාසීන්ගේ විතරක් නොවේ, පෘථිවි වාසින්ගේත් ජාත්‍යන්තර මට්ටමේ ජයග්‍රහණයක් !! සෙල්ලං ද - කාටද ආඩම්බර ඇහුවා ලු !!!

මොකක්ද මේ මංඤං කතන්දරේ කියලා අන්ද-මන්ද වුණ කඳුළු කැට වාසියෙක් ඉන්නවානම් හින් ටීකාවක් දෙන්නම්. වැඩිය බෑ; දන්නවනේ අපි ජිවත් වෙන්නේ අහවල් ප්‍රජාවගේ ප්‍රජාතන්තුවාදි රටක බව ! (ඕන් හීන් සැරේ අහගන්නකෝ; මේ කඳුළු කැටේ දිවයිනට මුදල්-හදල් වලින් ආධාර-උපකාර කරපු විදේශ උදවිය ගේ ඒ සබ්බ සන්තකෙත්, මේ රටේ වැස්සෝ මේ රටේදි මත්, පිටරටවලදීත් කඹුරලා, ආණ්ඩුවට ආදායම් උපදවල දිපු සබ්බ සන්තකේත් ඔක්කොම හැබෑම දේශප්‍රෙමයකින් යුතුව මේ කටයුත්තට අපේ ආණ්ඩුව මගින් ආයෝජනය වෙච්ච විදිය හිතල බලන්නකෝ. මීට වඩා නොකිවාට කමක් නෑනේ) ඉතින් මේ 'ජයග්‍රහනය'ට ජාත්‍යන්තර මට්ටමින් ම අපි හැමෝ ම වගේ දායක වෙලා තියෙනවා. (මේක අපි හැමෝගෙම ජයග්‍රහනයක් ද - නැද්ද; අපි ට ඕන කරන එක ද - නැද්ද  වගේ ප්‍රශ්න ඉතින් වෙන ම ඒව නේ)

තව දෙයක් ! ඉර බහින පළාතෙයි , පහළ මුල්ලේ පළාතෙයි පවත්වපු මේ මැතිවරණ දෙකේ දී, ඒව‍ායේ ජනතාව නියෝජනය කරපු 'ඡන්දදායකයෝ' ඔප්පු කළා, තමන් ගේ බය-පක්සපාති බව, පාලකතුමන්ලා ගැන.  උතුරු පළාතේ ජිවත් වෙන ජීවින් ට වඩා තමන්ට තියෙන්නේ ඇගඟන් එළියට එනකම් ම වැඩුනු වෙනස් ම කශේරුක‍ා පද්ධති වර්ගයක් කියන එකත් , ඒ එක්කම.

අ-වේලාවේ මට මෙහෙම දැනෙන්නේ මේ පේන ඉලක්කම් ඇත්ත ම- ඇත්ත කියලා භාර අරගෙන නොවෙයි.  ඒත්, ඒ විදියට භාර ගන්න- ඉවසන්න තියෙන සුවිශේෂ හැකියාව ගැන මේ වෙද්දී හොඳ තේරුම් ගැනීමක් තියෙන නිසා.





Thursday, March 27, 2014

අන්ද-මන්ද-ඡන්ද- මන්ද !

මේ සති ගණනක ඉඳලා ලංකාවේ බස්නාහිර හා දකුණ පළාත් දෙකේ 'ඡන්දකාර‍යෝ' අතර ලොකු උණුසුමක් ! කවුරුත් දන්නවා, හේතුව 'පළාත් සභා මැතිවරණ' කියලා.  මෑතක ඉඳන් හැම මැතිවරණයක් ගැන ම මගේ පෞද්ගලික ව නිරීක්ෂණයක් අනුව පාර්ශ්ව අතර 'අසමානුපාතික උද්යෝගයක්' තියෙන්නේ. මැතිවරණය මොකක් වුණත් ඒකේ වෙනසක් නෑ. අසමානුපාතික උද්යෝගය කියල මම අදහස් කළ එක තවදුරටත් පැහැදිලි කරනවානම්, කෙටියෙන් මෙහෙමයි. මැතිවරණයේ ඡන්ද අපේක්ෂකයන් හා ඡන්දදායකයන්  කියන ප්‍රධාන පාර්ශ්ව දෙක අතරේ මැතිවරණ උද්යෝගය සමාන අනුපාතයකින් නෙවෙයි වැඩකරන්නේ. තවත් පොඩ්ඩක් පැහැදිලි කළොත් ඡන්ද අපේක්ෂකයන්ගේ උද්යෝගය අහස තරම් වෙද්දී, ඡන්ද දායකයන්ගේ උද්යෝගය තියෙන්නේ අමාවකට පායපු හඳ වගේ. (මේක තාමනම් අනිත් පැත්තට වැඩ කළේ නෑ) කවුරු හරි ඡන්ද අපේක්ෂක-දායක තුමන්ලා-තුමින්ලා මේක කියවනවානම්, මගේ නිරීක්ෂණය ට  අදාල තත්වය ගැන අදහසක් කියලා මේක සංවර්ධනය කරන්න කියල ඉලලනවා.
දැන් පවත්වන්න යන පළාත් සභා මැතිවරණයන්ටත් මේක අදාලයි. 

ඡන්ද දායකයෝ කියන්නේ 'ප්‍රජාව' නම්, මේ විදියේ නිශ්ක්‍රීය ප්‍රජාවක් එක්ක කොහොමද ‍දෙයියනේ 'ප්‍රජාතන්ත්‍රවාදය' ආරක්ෂා කරන්නේ ! මේ ගැන තියෙන 'අවංක කැක්කුමේ බරපලකම' හන්දමද කොහේද ආණ්ඩුව කරවන ඇත්තොත්, කරවන්නට කල් බලමින් ඉන්න ඇත්තොත්  ‍ලෝකයේ තියෙන හා අළුත් ම උපක්‍රමත් පාව්ච්චි කරමින් 'ඡන්දදායකයිනි නැගිටිව්-ලංකාද්වීපය බේරාගනිව්' වගේ උනන්දුකාරක ගැන තමන්ගේ උනන්දුව පට්ට ඉහළින් පෙන්නුම් කරනවා.

ඒක කොයි තරම් 'ඉහළයි' ද කියතොත්, අඩු ම ගාණේ ඡන්ද නීති-රිති රැකගන්න එක ගැනවත් ඒ ගොල්ල හිතා බලන්නේ නෑ.  කියල දිල තියෙන සූත්‍රයේ හැටියට ඒකේ ඇති වරදක් නෑ; මොකද නිති-රිති රැකෙන්න ඡන්ද-ප්‍රජාතන්ත්‍රවාදේ තියෙන්න එපා යැ  ! ඒ වගේ ම ප්‍රජාතන්ත්‍රවාදය රැකෙන්නනම් රටක් තියෙන්න එපා යැ ! ඉතින් කොහොම කෙ‍ාහොම හරි මේ දේශපාලකතුමන්ලා මේ විදියට තෝරා පත් කර නොගත්තොත් රට රැකෙන්නේ කොහොමෙයි !!!

ඉතින් සුපුරුදු විදියට තාප්පයක්-ගහක්-ගලක්-‍බෝක්කුවක්-පාලමක් ගානේ හැම අස්ස-මුල්ලකම විතරක් නොවෙයි, එකා මත එකාත් මේ දවස්වල විරිත්ත ගෙන- අත් වනා ගෙන- නැති නෑකම් කියා ගෙන හැම තැනින් ම කඩා පනිනවා. පත්තරේ-රේඩියෝ-ටීවී-ෆෝන් අස්සෙන් පවා මතු වෙනවා.  ඒ විදිවලින් ග්‍රාහකයාගේ ප්‍රතිචාරය ඇස් පනා පිට බලා ගන්න අමාරු නිසා දෝ කොහේද, පොඩි පහේ පොකට් මීටින්,පිළිගැනීම් ඉඳලා පට්ට-පතාක ජන රැළි දක්වා 'ලයිව් ප්‍රොගෑම්ස්' සංවිධානය කෙරෙනවා. බටහිර ඉඳන් දකුණ ට-දකුණේ ඉඳන් බටහිර ට- ඒ එක-එකක් ඇතුළෙත් මේවා ට සහභාගි වෙන එකම හුදී ජන පිරිසකුත් ඉන්නවා. ඉතින් ඒ තරම් උනන්දුවක් දැනටමත් තියෙනවානම් මොකටද අමුතු උනන්දු කාරක ප්‍රොජෙක්ට් එකක් කියලා සහෘද හුදී-ජනයෙක් අහන්න පුළුවන්. ඇත්ත කතන්දරේ මෙන්න මේකයි; ඇත්තට ම ඒ ගොල්ලන්ගේ උනන්දුව මේ ඡන්දය ගැන ම නොවෙයි. රස්සාව, සහනාධාර වගේ වෙනත් දේවල් ගැන. ඒවා වෙනුවෙන් එයාලට සිදු වෙලා තියෙනවා තමන් ද ඇතුළත් ඡන්දදායක ජනයාගේ උනන්දුව වෙනුවෙන් උපකරණයක් හැටියට පාවිච්චි වෙන්න.බලහත්කාරයක් හෙම නෙවෙයි ඔන්න; ඒ ජනතාවගේ කැමැත්තෙන් ම තමයි එහෙ ම පාවිච්චි වෙන්නේ හොඳේ  ! මේ වැඩේ ට පොදු මහජන ආයතන හැටියට ආණ්ඩුවේ ආයතනවලින් පට්ට සපෝට් එකක් ලැබෙන්නේ. විශේෂයෙන් ම මැතිවරණ නීති-රීති වගේ දාහක් බාධක මැද්දෙත් මේ මැතිවරණ කාල සිමාව තුළ අළුත රස්සාවලට තාවකාලික ව බදවා ගත් අය, සහනාධාර පොරොත්තු ලේඛණවලට නම් ඇතුළත් වෙච්ච අය මේ වෙනුවෙන් යොමු කරලා, අවශ්‍ය විදියට ප්‍රවාහන වියදම්-කෑම බීම- නවාතැන් විතරක් නොවෙයි අවශ්‍ය විදියට රාජකාරි නිවාඩු එක්ක පඬිත් දීල ඒ ආයතන ප්‍රධානීන් විශාල අනතුරක් භාර අරන් තියෙනවා රට වෙනුවෙන් ආණ්ඩුව වෙනුවෙන්. මේවා විපක්ෂෙට නැති එක ගැන ඉරිසියා කරන්න හොඳ නෑ. ක්‍රමයක් හැටියට මේව රැකුණොත්, ඒ ඇත්තෝ බලයට පත් වෙච්ච වේලාවක කාට ද වාසි ! ඉතින් දුර දිග බලල වැඩ කරගන්න එක හොඳයි නොවැ ! අනික පෞද්ගලීකරණයනම් කරන්න හොඳ නෑ; මොකද, එහෙම වුණොත් හෙම කොහොමද මෙහෙම දෑ හිතකාමි වැඩක් කරගන්නේ. අනික, ඡන්දෙට විතරක් නොවෙයි, ඔය මානව හිමිකම් අපට එපා-බඩු මිළ තවත් වැඩි කරව් වගේ දේශප්‍රෙමීත්වයෙන් ඉහ-වහා ගිය සියළු වැඩකටයුතුවලට 'පොදු මහජන ආයතන' පවත්වා ගැනීම අත්‍යාවශ්‍යයි නේ. (ගජ-මිතුරු ධනවාදය යටතේ පුද්ගලීකරණය කළත් ඔච්චරම තමයි කියලා කෙනෙක් කියන්න පුළුවන්. හිතා පලන්න වටිණා වැඩක් තමයි)

මේ මැතිවරණයේ තියෙන පට්ටම පට්ට ජෝක් එක තමයි, මේක 'පළාත් සභා' මැතිවරණයක් වීම ! මම කිව හරි ද මන්දා ! මොකද, මේකට ඡන්ද ඉල්ලන අති ම අති බහුතරයක් තඩි ම තඩි පළාත් සභා විරෝධින්. මේ අතර සමහර අය ඉන්නවා මේ ඊයේ-පෙරේදාත් පළාත් සභාවලට බලතල දුන්නොත් රට බෙදෙනවා කියලා ඒවා අහෝසි කරවන්න කියලා හංදියක් ගානේ පෙත්සම් අත්සන් කරවලා ආණ්ඩුවට බලපෑම් කරවන්න කියපු ආණ්ඩුවේ ම කට්ටියත් ! දැන් මේ වගේ නහුතයක් උන්නාන්සෙලා මේ වෙලාවේ පළාත් සභාවේ බලය ඉල්ලන්නේ අනිවාර්යයෙන් ම "අපිට බලය නොදෙව්-තියෙන එකත් කපව්" කියන්න මිස වෙන අහවල් එකටද ! මොකද, මේ දිවි හිමියෙන් කළ රට රැක ගැනීමේ සටන පාවා දෙතෑකියැ, ඒ තරම් ලාබෙට ?

මේ සියළු උනන්දු කාරකවලින් ප්‍රබෝධමත් වුණ ඡන්දදායක ජනී-ජනයට මොකද දැන් කරන්න තියෙන්නේ.......? "මේ පාරනම් මොකක් හරි වෙනසක් ‍කරගන්න පුළුවන් වේවි" මට මුණ ගැහුණ හුදී ජනයින් කීපදෙනෙක් ම කීවා.  මගේ සාමාන්‍ය නිරික්ෂණය තමයි ඡන්ද ප්‍රතිපල කියන ජාතිය ඇහුවා ම මේ පූර්ව ඡන්ද ප්‍රතිඵල නිරික්ෂණයන් ඒවායෙන් පිළිබිඹු වෙන්නේ නැ කියන එක. සූත්තරේ මොකක්ද කියලනම් තේරෙන්නේ නෑ අවංකව ම ! ඉතින් මට හිතෙන්නේ මැිතවරණය දාට ඡන්දදායකයෝ හැටියට අපි ගිහිල්ල කරන්නේ පූර්ව විනිශ්චය කරන ලද ප්‍රතිපලයක් සුජාත කරන්න අවශ්‍ය 'ජාතික යුතුකමක්' වගේ දෙයක් කියලා ! (උතුර වගේ 'ජනතාවක්' ඉන්න තැනකට අදාල ව මේක වෙනස් බවට මම එකඟයි) ඉතින් ප්‍රතිපල වහන්සේ වැඩියා ම අපිට බලාගන්න පුළුවන් වික්‍රමබාහු කරුණාරත්නලා වගේ (මගේ මතකයේ හැටියට පළාත් සභා ක්‍රමයත්, බලය බෙදිමත් රැකගන්න ඒ මුල් දවස්වල පෙනි හිටපු ඇත්තන්ගෙන් අදත් ඒ ස්ථාවරයම වෙනස් නොකර පෙනි හිටින්නේ ඒ අය විතරයි )අය විසි වෙලා, මහ ආණ්ඩුවෙන් අංශුවක්වත් බලය එපා කියන, අර උඩ කියපු වර්ගයේ ඇත්තෝ බලයට පත් වෙලා තියෙන විදිය ! ඒක වෙන සූත්තරෙත් ඔන්න මටනම් තේරෙන්නේ නෑ !

මොනවා වුණත් මට තේරෙන්නේ අපි මේ විදියට 'ප්‍රජාතන්ත්‍රවාදය' කියන එක පට්ට ම පට්ට ජෝක් එකක් කර ගෙන අසික්කිත රසවිඳිමක බුදි වදිනවා කියලා !